Episode 2

Wala ng buhay si Raquim nang natagpuan sya nila Aquil. Isang pagpupugay ang nasambit nito para sa prinsipe. Sa tabi ng ama, si Amihan buhay ngunit walang malay kaya't inuwi nila ito pabalik sa Encantadia. Nasundan sila ng espiya. Nag-iwan ito ng palatandaan para sa kanyang panginoon sa parehong lagusan na dinaanan ng kawal ng reyna.

Nasa ibang mundo na si Amihan. Isang nilalang mula sa kwento ng kanyang ama ang nasilayan nya sa kanyang pagmulat. Wala na ang kanyang sugat ngunit wala na rin ang kanyang ama. Magpagayun pa man, di sya nag-iisa dahil kapiling na nya ang kanyang ina at mga kapatid. Isang awit ang muling nagpakilala sa kanya ng kanyang ina. Di man madali para sa kanya ang mga natuklasan, mas lalong di madaling matatanggap ng panganay na anak na si Pirena ang pagbabalik ng kapatid. Iginiit nyang hindi sya nito kapatid at di sya nito kikilalanin.

Tangan pa rin ni Amihan ang espada ng ama. Patuloy nitong pinaaalala ang kanyang sinapit at ang binilin sa kanya. Isa ito sa dahilan kung bakit gusto nyang maging reyna. Espada ang sagot para masugpo ang kasamaan, turo ng ama. Di sumang-ayon si Meni-a kaya pinasumpa nya ang anak na di na muling hahawak ng sandata. Labag man ito sa damdamin nangako sya at humingi ng tawad sa pagsuay sa bilin ng ama.

Sa pamamasyal ng mga prinsesa ay dumating ang mga Hathor. Pakay nilang dukutin si Ynang Reyna. Sa pamumuno ni Agane, tinugis nila ang apat na prinsesa, na gumamit naman ng kani-kanilang mga kapangyarihan para ipagtanggol ang mga sarili. Binalak ni Amihan na gamitan ang espada para ipagtanggol ang mga kapatid pero dumating si Imaw para protektahan sila.

Dumating na ang mga paru-paro, kailangan nang isa sa kanila ang humalili sa reyna. Nagtalu-talo sila kung sino ang dapat maging reyna kaya't tinukoy ni Aquil na malalaman lamang ito sa pamamagitan ng isang pagsubok.

Di karapat-dapat maging reyna si Pirena. May lihim sa kanyang pagkato ang kinukubli ng reyna sa lahat kahit sa kanyang tagapayo. Gusto nyang isa sa tatlo pang mga anak ang magtagumpay sa pagsubok. Ang pag-uusap na ito ay napakinggan ni Pirena ng palihim na ikinasama at nagpasidhi sa kanyang damdamin.